1 - القهوة الساده :-

تجربه مريره 😲 لو مش قدها متجربش ✋ الموضوع أكبر من تخيلك 💆 تكمله الكوبايه بدون ما بطنك تقلب و نفسك تقفل معناها ولاده وحش جديد مبيخافش من أي حاجه بطل لا تقهره الظروف 💪  الموضوع عذاب بدون مبالغه ، مع أخر رشفه منها بيتولد جواك شعور دفين بالألم و الحزن بدون مبرر ! الموضوع كله أذواق و وجهة نظر ومش قانون او قاعدة عامة بس علميا وعمليا سُمك و كثافة فنجان القهوة يعنى مخلوط البن مع الميه بيبقى أفضل كلما كان السكر قليل لأن ذوبان السكر فى الميه بياخد من مساحة البن و بيقلل كثافة البن فى الميه ، وده بيبقى من ضمن أسباب ما يعرف بالقهوة الصايصة لو معمولة وحش كمان أى نوع من الأنواع اللى فوق ، لو انت بتعملها بنفسك بيضاف للمزاج مزاج تانى مختلف انت لازم تقلب القهوة كويس جدا حتى وهى على النار و أكيد عارف انها بتتعمل على نار هاديه ويسلام لو عملتها على سبرتايه وفى كنكه نحاس بندقى ده نوع من انواع الخصوصية فى العشق و مبالغة فى تقدير وإحترام قيمة القهوة بالنسبة لك انك تشترى عدة مخصوص للقهوة وتعملها بنفسك دايما ، و هنا تكون وصلت لمرحلة انك مش هتعرف تشرب قهوة غير بالشكل ده ، مش هتقدر ترجع لأى مرحلة تانية ، هتبقى بالنسبة لك سطحية لانك وصلت لأعمق أعماق المحيط الفكرى .

2 - قهوة علي الريحه :-

( 0.5 سكر : 1 بن ) مع السكر اللي بينخفض تدريجياً و طغيان طعم البن ف نحن أمام قهوه صنعت من أجل ال Professionals Only عشان مستحيل تلاقي مبتدأين بيشربوا القهوه علي الريحه ، فيه قاعده عامه ؛

 كلما قلت نسبه السكر بالنسبه للبن ؛ اظهرت مدي خبرتك .

3 - القهوة المضبوط :- 

( 1 سكر : 1 بن ) قهوه متكافئه تماماً و السواد الأعظم من المدمنين بيلعبوا في ال Category دا ، قهوتك المظبوطه تدل علي شخصيتك المتزنه العادله اللي مبتحبش حاجه تيجي علي حساب حاجه ، إستمتاعك بطعم البن بكميه سكر متوازنه بيخلق جو من السعاده المفرطه التي لا تنتهي سوي مع أخر رشفه من الكوب .


 4 - القهوة المانو :- 

القهوه المانو هيا الوسط بين المظبوط و الزياده ، ملعقه و نصف سكر لكل ملعقه بن ( 1.5 سكر : 1 بن ) المانو غالباً بيتم اللجوء لها في حالتين
1- يا إما زهقت من الزياده و عايز تنتقل للمظبوط و بتتعود تدريجياً علي تقليل السكر .
2- يا إما إنتا أصلاً كييف مظبوط بس بتقعد علي قهوه شغال فيها صنايعي علق و فاشل و عمره ما عرف يظبط قهوتك ف بتضطر تطلبها مانو ب نيه المظبوط و التكتيك دا ناجح تماماً مع القهوجيه الفشله .

5 - القهوة الزياده :- 

القهوه الزياده بتبقي 2 ملعقه سكر لكل ملعقه بن ( 2 سكر : 1 بن ) دايماً بتكون هيا المدخل اللي بتتسحب فيه نحو عالم إدمان القهوه اللذيذ  ﻷنها قهوه سكرها الزياده بيكسر طعم البن المر اللي لسه مبتدئ متعودتش عليه ، فيه ناس بتستمر في تناول القهوه الزياده ، كييفه الزياده بيبقوا ناس ف الأغلب بيهتموا بالمظهر علي عكس الجوهر ، ناس مقضينها For Fun و يحبوا يعيشوا التجربه من السطح بدون التطرق للأعماق و بيقفشوا لو القهوه جاتلهم ناقصه سكر و دا يدل علي خوفهم من كل ما هو مظبوط أو مانو .

6 - السرياقوسي :

القهوه السرياقوسي بتبقي عباره عن 3 معالق سكر لكل ملعقه بن ( 3 سكر : 1 بن )  مبدأيا معظم عشاقها بيبقوا غالبا من محدثين القهوه اللي لسه متلطوش ف الحوار أو من النوع اللي بيشربها كل فين و فين ، قهوه تفضلها النساء في المجمل ، السكر الزيادة أوى لزوم العصير مش البن .



Share To:
Next
Newer Post
Previous
This is the last post.

محمد حسن

Post A Comment:

0 comments so far,add yours